Na Fiji Pine Limited a tauyavutaka noda Matanitu me sala ni vakatubu bisinisi ena noda delaniyavu, me vakayagataki talega kina na veitalasiga ena tei paini ni Karipea.

Na veipaini sa tauyavutaka na Fiji Pine ena veitalasiga e Vitilevu kei Vanualevu sa yacova na 23,866.7 na ekatea ena ika31 ni Tiseba 2017. Sa inaki ni Fiji Pine me na toso tikoga na tei paini, me dei tuga kina na cakacaka ni tei paini e noda vanua mai muri. E kena inaki talega me taqomaka na veivanua mareqeti (cultural sites), salavata kedra vueti na veivanua sa vakacacani.

Sa rawata na kabani na icovi ni Veikau Qaravi Vinaka (Well Managed Forest) ena ika28 ni Okotoba 2013. Na icovi qo na ivakadinadina ni sa yacova kece na kena itagede me vaka na maroroya na veikabula, yaga ena bula raraba, qai rawailavo.